都有三個月冇上黎寫blog啦,正如我第一個blog嘅主題: “其實我好懶......”由細到大我做野都係冇恆心,好多時d野做一兩次就會放棄;有d人會正式決定以後唔update 個blog,但係我諗我唔會,因為我都希望有呢個地方可以update吓d friend.

我地終於決定係今年12月27日註冊結婚啦! 過年後有一次同我地啊媽啊爸食飯時提出嘅.暫時計劃會下午cocktail註冊儀式:主要邀請朋友,晚上親戚食飯.因為下午cocktail場地空間所限,所以請未能邀請的朋友原諒.

依家開始搞結婚,初時未落實場地都幾煩同担心,因為我地都比較遲先開始搞 (有同學下年年尾結婚, 依家已經開始搞!)不過我地都鍾意簡單,同埋相方家長都冇要求要做足,所以都比較輕鬆.不過都少不免有意見分歧,希望分歧可以解決啦.

上星期六終於搬入南丫島啦﹗因為我地兩個唔係有好多野﹐所以可以一次過搬。依家已經unpack得七七八八﹐待星期三d傢俬送埋入黎就ok啦﹗不過好多野都重要慢慢適應, 剛又好打風…真係黑仔...次次一落街就落大雨…我同佢返工都好狼狽….不過我地冇後悔搬入黎﹐因為呢度真係好環境﹗

其實南丫島都好方便,因為至少有銀行﹑郵局同圖書館。D物價係貴少少同埋種類唔多﹐但係酒類就相反﹐可能多外國人住﹐所有種類多而且價錢唔貴...啱晒我地! 

大家可能會發現我經常都提起“佢”,的確“佢”兩年前開始已經係我生活嘅一部份,到咗依家佔咗好大部份! 諗起我之前做人都冇晒方向,做份工辛苦都唔知為咩…依家好多時開工做野辛苦都會諗起佢,我地唔可以經常傾電話,但係好多時都會發sms亙相鼓勵大家!

另外, 我自己d囉嗦野好多都係d公司野, 好多時都唔方便寫出黎…話就話係blog, 不過我始終唔太習慣自己d私人野太過赤裸裸咁公開…

我依家已經去咗人生另一個階段,雖然唔會再好似以前咁諗,但係亦都冇後悔之前嘅一d決定… 亦都知道凡事唔可以太緊張,“船到橋頭自然直”, 依家“感覺良好”, 覺得好weathly!

上星期五佢同我講話驚之前去in果份工收唔到信去2nd in,我只係可以叫佢唔好太緊張,結果呢一份佢真係收唔到信!佢諗自己唔會真係差到連2nd in都入唔到…我同佢講有時d野真係好難講…之後傍晚佢話畀我聽佢依家份工轉到長工! 重應該會加人工!果時我真係好開心,我即刻上佢屋企幫佢攞封offer letter出黎(因為佢驚佢啊媽睇錯),之後我話:“其實如果冇西瓜食蘋果都好,可能蘋果重啱食呢”

呢排主要都係準備搬屋,計劃要買一切所需嘅物品,雖然間屋已經有好多傢具,不過要買嘅亦唔少…

早輪話想去睇下南丫島d租盤,上星期終於有時間同佢一齊入去… 聽同事講呢排近暑假d租盤唔多,但係我地都睇咗六﹑七個,雖然唔係個個都咁好,但係都已經符合我地嘅要求啦! 最後confirm租咗一間! 因為現時嘅住客未搬走, 我地要八月頭先可以搬入去…到時就可以實現我地嘅“Lamma dream,Lamma life”啦!

呢排都好忙,除咗睇樓外,重要幫手當更…車更﹑回歸d大更﹑平日更…都係暑假先有咁多時間去幫手咋, 不過遲d又要忙搬屋lu…

今日係我地兩個係埋一齊兩週年嘅大日子, 兩年可以話係好短(相對於一生人而言), 但係對我呢講係好長(佢話:”你同我一齊好似”度日如年”咩?”) 我只係珍惜同佢嘅每一分﹑每一秒… 諗起當初係埋一齊真係唔容易! 呢兩年我地經歷咗好多野! 要搵一個自己真心鍾意嘅人亦都唔容易!

有時覺得人唔須要諗太多野, 你要珍惜依家有嘅一切, 享受生活,先至對自己有交代! 我諗起我印尼果時個鬼佬老細同我講:”Stephen, you come to here, you have to work hard, play hard!”我依家覺得佢講得好啱!

星期五收工本來打算出去南丫島睇樓,但係真係太疲所以放棄,希望遲一兩個星期有時間可以去睇啦。

前幾日放假同d ham 飲茶,佢地一黎到就問我幾時結婚,我又係官方暨工式嘅答案: "下年囉",其實我女友冇畀壓力我,只不過係我覺得係時候做呢樣野,雖然好多人都話一紙婚書唔代表乜嘢,但係我就覺得呢d係兩個人關係既認同同肯定。

亦有d人話如果真係咁好就唔使結婚,但係我又覺得果d人可能根本未去到呢個階段。 我之前睇過一篇文章,話呢d人只係想畀個藉口自己,佢地唔想畀一紙婚書綁住; 或者佢地見到有唔少人離婚,所以就對結婚冇信心。我覺得要變嘅話,的確係一紙婚書都控制唔到,但係如果對婚姻都冇信心的話,就好難同另一半走往後嘅路。

曾經有個朋友同我講:“肥仔, 你依家同你女朋友咁好, 因為你地重係蜜月期, 但係你地結咗婚就會唔同晒啦!”咁我問佢:“你同你老婆結咗婚成十年,咁你地點維持呢?”佢答唔到我…… 所以,有d野唔可以諗得太灰…我以前就係咁,所以好多時唔開心!

之前要返學嘅日子真係太忙, 忙到好多野都冇時間諗; 到依家放暑假啦, 又係懶洋洋……唔想諗野, 不過, 都希望呢個暑假可以做番一d之前太忙冇做到嘅野, 佢話我依家好似d小學生咁有d暑期計劃!

今日係轉更嘅day-off, 舊時覺得只係放一日假唔夠侯 (因為其他day-off 都有連續兩日), 但係依家雖然只係放一日我都會好珍惜! 因為返工真係好攰! 放假都冇諗過去邊, 只係可以係屋企抖下已經好好! “No planning is a good planning”, 正如我之前講, 可以hae 其實係最好嘅! 可以有時間畀你停落黎, 留意下身邊嘅人同事, 去享受下生活…… 太忙會失去好多野…… 有d野冇咗就搵唔番.

雖然話已經考完試, 但係都要今日先至可以真係抖抖. 因為早幾日都要返通宵更,  唉! 有時諗吓寧願搵少d轉一份冇咁辛苦嘅工 (好似好冇志氣…), 依家好多時收工搭車都攰到訓到唔識醒! 回想初初做呢份工果時, 的確好有滿足感同埋社會責任感, 好似人地當差一樣 (當然我唔係警察啦!) 不過做咗幾年之後, 發覺其實都只係一份工! 果時好多同事都會由後生做到退休, 三﹑四十年嘅青春畀咗公司!

唉! 我諗我好難可以係度做到退休…因為體力要求同壓力都好大! 好多人會 ”O”咀點解我地一份工可以做咁奈… 真係好難講. 唉! 其實唔係話唔想轉, 只不過係轉唔到! 因為我地份工行頭真係好窄, 全香港只係得兩間公司, 重要有不明文規定另一間公司唔會請你…

都做咗十幾年啦, 三十幾歲人都要定落黎, 我就一定唔可以好似d人咁, 要做一份係自己興趣嘅工… 話到尾都只係為五斗米而折腰, 正如我女友話 ”如果要唔為五斗米而折腰, 最好就係可以全職去做義工!”

我只係發洩吓, 已經有d語無倫次…可能返完通宵重未recover, 唔寫住啦…

考完晒試啦! 放暑假啦! 雖然星期一果科Telecom應該ok, 不過尋晚果科Control就唔係好掂! 份卷7選5, 頂多得2條半有信心, 拉到有c都偷笑啦… 因為舊年有一科肥咗未retake, 重希望可以拉番高少少gpa(平均分) 添... 因為係 honor degree, 總平均分要高過 c 先可以grad, 重要總平均分高過 c+先有 2nd hon, 先可以 charter (入HKIE), 不過依家好以要讀埋master先得. 唉, 所以讀 Polyu part-time degree真係好辛苦, 我老細上次重話 "唔係pass 過關就ok咩?", 我同佢講, 如果連續兩個學期平均分低過c就要走.

算啦, 都定晒局啦, 依定應該要 relax 下, 之後諗下暑假做d咩好…

呢兩日本來應該全速溫習, 準備星期一嘅考試, 不過進度好慢; 又冇咩mood, 所以寫吓blog先.

其實一開始寫blog都冇諗過可以維持幾奈, 只係諗寫blog冇寫日記咁困身, 同埋blog係公開嘅野, 可以比d 朋友知道我嘅近況同諗法, 但係有d太過私人嘅野就唔可以寫. 我以前有一個關於業餘無線電嘅個人網頁(http://www.qsl.net/vr2zst/), 但係因為太忙同太懶, 所以都有三﹑四年有更新啦! 不過依家睇番自己果時都好得意… 希望呢個暑假有時間可以做一個大更新啦!

唔知係咪人大個咗, 好想留番一d已前嘅野, 最好就係寫低或者影相. 我舊時唔係太鍾意影相, 就算有都可能只係group photo, 仲要影相果時唔識笑 (果時我覺得自己笑得唔自然, 同唔好睇…), 不過咁多年都積存有唔少照片, 我希望有時間可以scan晒入電腦, upload晒上網上相薄… 好啦, 都要繼續溫習, 下次再寫過! (其實我打字好慢, 寫呢篇野已經用咗二,三十分鐘啦!)

到咗五月又要進入作戰狀態! 本來諗住可能係考試前抖番個星期, 點知原本六月頭嘅兩個公司內部考試, 改早咗係上星期五考 (仲要係星期一先通知!) … 梗係唔夠時間準備啦! 有一個考試考得唔係咁好… 不過都好彩過到關… 依家仲好, 考咗唔使煩.

依家只係想快d考完試, 可以輕鬆一下… 同埋都會準備搬出黎住, 因為依家每日返工來回都要用成四個鐘, 雖然話呢十幾年來都係咁, 但係真係覺得好攰! 另一方面, 我諗依家都係時候要自立, 唔可以永遠都依賴屋企. 暫時諗會搬去公司附近住. 除咗交通之外, 其實我地兩個都鍾意果度嘅環境, 因為我地兩個都鍾意靜. 可能好多朋友(由其係佢d朋友)都會 “O” 咀, 但係我地諗如果係裡面住番兩, 三年都幾好!

尋日放假去咗當更﹐係一個佛教機構植樹活動﹐地點係大欖郊野公園。當初以為會落雨﹐但係後來好晒﹐好在都有帶雨傘上山。由車路步行到植樹地點要行大約20分鐘山路(上山)﹐行開山嘅我當然係冇問題! 上咗一小段山路﹐已經有一個中學生(肥仔) 老抽﹗唉﹗真係唔係太掂… 之後發現主持佛教儀式嘅大師(都有六﹑七十歲) 就完全冇問題﹗

到佛教儀式完成之後﹐d中學生植樹時都係好”少爺兵”﹐種咗一﹑兩棵就停晒手﹔但係反而啊大師就親力親為﹐都種咗至少五﹑六棵 (我當初仲以為佢唔會種)﹗

我覺得依家d年青人太過”少爺兵”﹐好怕辛苦同好容易放棄。

尋日返完通宵收咗工, 去咗亞洲博覽館當更, 雖然好攰好眼訓, 但係之前又應承咗,所以都去幫吓手.去到雖然已經12點半, 但係總算冇失更. 我問女友佢會唔會覺得我”攞苦黎辛”, 佢話我咁樣都係幫到手, 大sir 叫到又好難推. 好彩佢都支持我!

 講起份工, 有時真係覺得”歲月不留人”, 諗起初初做呢份工果時, 返幾晚通宵仲可以返學﹑訓兩﹑三個鐘起身做功課 … 唉! 不過依家就好辛苦啦! 依家返完通宵好多時都校唔番個”生理時鐘”, 到夜晚好攰但係都訓唔到. 好似尋晚咁,要飲少少酒先至可以訓好d… 不過好彩呢兩日可以抖番下.

上星期五測完驗之後總算鬆一口氣! (不過要睇下星期五派卷先知!) 雖然仲有一份 lab report 未做,但係已經好好多啦!

我之前同自己講測完驗要好好relax下,所以我同女朋友去咗我地嘅老地方: 荃灣Outback (http://www.outback.com.hk/) 其實我地兩個都鍾意飲酒(呢度有2段happy hour時間)﹑ d歌好啱聽(啱我地嘅年紀)﹑ d扒又幾有質素…… 雖然好多人都話覺得貴(但係我試過一個星期去咗3次), 但係因為我地唔係太多機會可以去(因為我地兩個都好忙), 所以都ok.

我地可以係度食餐晚飯食4﹑5個鐘(2 round happy hour + 晚飯), d staff 真係多得我地唔少! 用芝士薯條餸酒係我地嘅favourite, 食完飯仲要整番個 Chocolate Thunder!

其實仲有一件事,就係我生日果日在荃灣Outback同我女朋友求婚! 呢度真係畀我地有好多happy memories, romantic memories.

我覺得有時好多野未必可以用錢買到,亦都未必可以用錢去衡量;我地好滿足依家可以有咁嘅生活,雖然唔可以餐餐大魚大肉,但係都可以用有限嘅錢去relax一下,更加重要係心靈上嘅滿足! …… 令我更加真惜依家有嘅一切!

依家先知咩叫做”甘”!

人地復活節有五日假期, 如果唔讀書嘅可以去玩, d 同學仲可以有幾日準備測驗、做lab report、做assignment…… 我就得番一日,都唔知做邊樣先好! 測驗呢幾日仲要連續4晚返overnight…… 唉! 尋晚測完驗見到d同學交lab report, 自己就未做完…… 又禍不單行, 開工整親隻手… 好彩仲寫到字!

尋日都係近來少有嘅”救傷隊生活”:下午去當更,晚上去救傷隊春茗.其實都冇咩好寫....不過只係覺得,係讀書之後真係少咗好多空餘時間.正如有好多玩無線電嘅朋友都覺得我失咗踪,但係我想講: 我從來冇放棄過我嘅興趣,只不過係依家要發力,唔可以掛住玩. (唉!諗起先幾年就…) 希望讀完書之後有番多d時間, 去組織家庭同埋搵番d興趣啦.

呢句話令我諗起我同我女友當初果時,我地其實好辛苦,好多困難要面對(唔係公唔公開嘅問題.), 經過咗之後大家都好珍惜對方.祝師兄同師姐感情生活美滿啦!